ရွေးရမယ့်လမ်း

ဒီဟာတွေကတော့ ပါမောက္ခချုပ်ဆရာတော် ဟောကြားခဲ့တဲ့ ‘ဘဝခရီးဝယ် ရွေးချယ်ရမယ့်လမ်း’ ဆိုတဲ့ တရားတော်ထဲက ကောက်နုတ်ချက်တွေပါ။​ 

လူတိုင်းလူတိုင်း ရထားကြတဲ့ ဘဝခရီးမှာ ဘယ်လမ်းကို ရွေးချယ်ပြီး လျှောက်ရမလဲဆိုတာဟာ အင်မတန် အရေးကြီးတဲ့ ပြဿနာတစ်ခုဖြစ်ပါတယ် ။ ခေတ်အခြေအနေအရ ဘာသာတရားတွေ အမျိုးစုံ၊ ယုံကြည်ချက်တွေလည်း များပြားလွန်းတဲ့အတွက် အမှားနဲ့ အမှန်ကို ရွေးချယ်ဖို့ ခဲယဉ်းနေပါတယ် ။ ဒီလို အခက်အခဲတွေအတွက် ဗုဒ္ဓမြတ်စွာက ကေသမုတ္တိသုတ် (ကာလာမသုတ်) မှာ ဘဝလမ်းညွှန်ချက်တွေကို ဟောကြားခဲ့ပါတယ်။

ကိုယ်ပိုင်ဉာဏ်နဲ့ ဆုံးဖြတ်ခြင်း 

အမှန်တရားကို ရှာဖွေရာမှာ အားကိုးလို့ မရတဲ့ အချက် ၁၀ ချက်ကို မြတ်စွာဘုရားက ဦးစွာ ဖယ်ရှားပစ်ခိုင်းပါတယ်။ ရှောင်ရမယ်လို့ ဆိုတာပါ။ အဲဒါတွေထဲမှာ တဆင့်ကြားစကား (hearsay) ၊ အစဉ်အလာ ယုံကြည်မှု (tradition) ၊ စာပေကျမ်းဂန်လာ အချက်အလက်တွေ၊ ကျိုးကြောင်းဆင်ခြင်မှု (logic) နဲ့ ကိုယ့်ဆရာသမားရဲ့စကား ဒါတွေ ပါဝင်ပါတယ်။ 

အဲဒီအချက်တွေကို အခြေခံပြီး မဆုံးဖြတ်ဘဲ ကိုယ်တိုင် လက်တွေ့သိတဲ့ အသိဉာဏ်နဲ့ပဲ ဆုံးဖြတ်ရမယ်လို့ ဆိုပါတယ်။​

ဥပမာ-

• လောဘ၊ ဒေါသ၊ မောဟ စတဲ့ တရားတွေဟာ ကိုယ့်ကို ပူလောင်စေပြီး ဆိုးကျိုးတွေပဲ ဖြစ်ပေါ်စေတာကြောင့် မကောင်းတဲ့အရာတွေ ဖြစ်ကြောင်း၊

• အလောဘ၊ အဒေါသ၊ အမောဟ (မေတ္တာ၊ သည်းခံခြင်း၊ ပညာ) တို့လို တရားတွေကတော့ ကိုယ့်ကို ငြိမ်းချမ်းစေပြီး ကောင်းကျိုးချမ်းသာကို ဖြစ်ပေါ်စေတာကြောင့် ကောင်းတဲ့ အရာတွေ ဖြစ်ကြောင်း၊

ကိုယ့်ဟာကိုယ် ဆန်းစစ်ဆုံးဖြတ်ရမှာ ဖြစ်ပါတယ် ။

မှားမှန်းသိရင် ချက်ချင်း စွန့်ပစ်၊ မှန်မှန်းသိရင်လည်း လက်ခံကျင့်သုံးရမယ်လို့လည်း ဆိုပါတယ်။​

ဘဝနေနည်း

လူမှုပတ်ဝန်းကျင်မှာ အတူနေထိုင်တဲ့အခါ ဖြူစင်တဲ့စိတ်နဲ့ နေထိုင်ဖို့ မေတ္တာ၊ ကရုဏာ၊ မုဒိတာ၊ ဥပေက္ခာ (ဗြဟ္မစိုရ်တရားလေးပါး) တွေကို လက်ကိုင်ထားဖို့လိုပါတယ်။ ဒီတရားတွေက ငြိမ်းချမ်းရေးအတွက် အဓိကသော့ချက်ဖြစ်ပြီး ဒေါသကို အဒေါသ (မေတ္တာ)နဲ့၊ လောဘကို အလောဘနဲ့၊ မောဟကို အမောဟ (ဉာဏ်ပညာ)နဲ့ ဖယ်ရှားပစ်နိုင်တယ်လို့ ဆိုပါတယ်။

သံသယပြဿနာတွေအတွက် လမ်းညွှန်ချက်

နောက်ဘဝ ရှိ၊ မရှိ ၊ ကုသိုလ်၊ အကုသိုလ်တွေက အကျိုးပေး၊ မပေး စတဲ့ ကိုယ်ပိုင်ဉာဏ်နဲ့ အဖြေမထုတ်နိုင်တဲ့ ပြဿနာတွေရှိနေရင် အခြေအနေနှစ်ခုစလုံးမှာ ကောင်းစေမယ့် သေချာတဲ့ လမ်းကို ရွေးရပါမယ်တဲ့။

• လူတော် လူကောင်း ဖြစ်အောင် နေထိုင်ပါ။ ။ ဒီလိုနေထိုင်ခြင်းအားဖြင့် နောင်ဘဝရှိရင်လည်း ကောင်းတဲ့ဘဝ ရောက်မယ်။ နောင်ဘဝမရှိဘူးဆိုရင်လည်း ဒီဘဝမှာ လူကောင်းအဖြစ် ဂုဏ်သိက္ခာရှိစွာ နေရမှာဖြစ်ပါတယ် ။

• အကုသိုလ် (မကောင်းမှု) ကို လုံးဝမကျူးလွန်ဘဲနေပါ။ ။ အကုသိုလ်တွေမှာ အကျိုးပေးရှိတယ်လို့ဆိုရင်လည်း ကိုယ်က မကျူးလွန်ထားတဲ့အတွက်ကြောင့် ဘေးကင်းတယ်၊ တကယ်လို့ အကျိုးမပေးဘူးဆိုရင်လည်း ပြဿနာရှိမနေဘူး။

ဒီလမ်းညွှန်ချက်တွေဟာ ဘဝခရီးမှာ စနိုးစနှောင့် မဖြစ်ဘဲ မှန်ကန်တဲ့ လမ်းကြောင်းပေါ် လျှောက်လှမ်းနိုင်ဖို့ မြတ်စွာဘုရားက ဟောကြားခဲ့တဲ့ သဘာဝတရားတွေဖြစ်တယ်လို့ ဆိုပါတယ်။​